އަޅުގަނޑުމެން އެންމެންވެސް ޚަޔާތުގައި ވަރަށް ގިނަ ހެޔޮކަންކަން ކުރެވޭތޯ މަސައްކަތް ކުރަމެވެ.

ނަމަވެސް ދިރިއުޅުމުގެ ކަންކަން ހުންނަގޮތުން ބައެއްފަހަރު އަޅުގަނޑުމެން ބޭނުންވާ ވަރަށް އަޅުކަމުގައި ވަގުތު ހޭދައެއް ނުކުރެވެއެވެ.

ނަމަވެސް މިކަމާ ދެރަ ނުވާށެވެ!

ރަސޫލާ ﷺ ޙަދީޘްކުރެއްވިއެވެ: (إنَّمَا الْأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى)  (ބުޚާރީ އަދި މުސްލިމް)

މާނައީ: ”ޢަމަލުތައް ބިނާވަނީ، ނިޔަތްތަކުގެ މައްޗަށެވެ. އަދި ކޮންމެ މީހަކަށްވެސް ވާހުށީ އެމީހަކު އެ ނިޔަތްގަތް ކަމެކެވެ.“

އިސްވެ ބަޔާންވެފައިވާ ޙަދީޘްބަސްފުޅުގެ އަލީގައި އިލްމުވެރިން ވިދާޅުވާ ގޮތުގައި، މުބާޙް ނުވަތަ ހުއްދަ ކަންކަން ޞޯލިޙް ނިޔަތެއްގައި ކޮށްފިނަމަ އޭގެ ޘަވާބާއި ދަރުމަ ﷲ ތަޢާލާ ދެއްވާނެއެވެ.

ލޮބުވެތި އަޚުންނާއި އުޚްތުންނޭވެ! އެހެންކަމުން ޙަޔާތުގައި ކުރަންޖެހޭ އެކި ކަހަލަ މަސައްކަތްތައް ކުރާއިރު ނިޔަތް ބަދަލުކޮށްލާށެވެ!

ޢާމްދަނީ ހޯދުމަށް ކުރާ މަސައްކަތަކީ އަޅުކަމަކަށް ބަދަލުކޮށްލާށެވެ! އެއީ އަނބިދަރީންނަށް ޚަރަދުކުރުމުގެ ވާޖިބު އަދާކުރުމަށްޓަކައި ތިބާ ކުރާ މަސައްކަތެކެވެ. ﷲ ތަޢާލާގެ މަގުގައި ހޭދާކުރުމަށް ފައިސާ ހޯދުމަށް ކުރާ މަސައްކަތެކެވެ. އަމިއްލަ ނަފްސަށް ވާ ޙައްޤުތައް އަދާކުރުމަށް ތިބާ ކުރާ މަސައްކަތެކެވެ.

ބަދިގޭގައި ކާތަކެތި ތައްޔާރު ކުރާ ހިނދުގައި ﷲ ތަޢާލާ އަށްޓަކައި އެކަންކުރާށެވެ! އެއީ ތިބާއަށް ދެވޭ ޞަދަޤާތެކެވެ. އާއިލާގެ އަފްރާދުންނަށް ވެވޭ އިޙްސާންތެރިކަމެކެވެ.

ދަރިންގެ ކަންތައްތައް ކޮށްދިނުމުގައި ޘަވާބާއި ދަރުމައަށް އެދޭށެވެ! އެއީ ﷲ ދެއްވާފައިވާ އަމާނާތަށް ފަރުވާތެރިވުމުވެ. އެއީ މުސްލިމު އުންމަތަށް މަންފާކުރުވަނިވި ދަރީންތަކެއް ތައްޔާރުކުމަށް ވެވޭ ޤުރުބާނީއެކެވެ. އެއީ މަރުވުމަށްފަހުގައިވެސް ތިބާއަށްޓަކައި ދުޢާކޮށް ހެޔޮޢަމަލު ކޮށްދޭނެ ދަރީންތަކެއް ތައްޔާރުކުރުމެވެ.

ދެމަފިރިން އެކަކު އަނެކަކަށް ވަގުތު ދޭ ހިނދުގައިވެސް ﷲ ތަޢާލާ ގެ ޙަޟްރަތުން ޘަވާބާއި ދަރުމަށް އެދޭށެވެ! އެއީ އެކަކު އަނެކަކަށް ވެވޭ ހެޔޮކަމެކެވެ. އިޙްސާންތެރިކަމެވެ.

ނިދާވަގުތުގައި އަދި ކެއުމާއި ބުއިމުގެ ވަގުތުގައިވެސް ނިޔަތް ބަދަލުކޮށްލާށެވެ! އެއީ ﷲ އަށް އަޅުކަން ކުރުމަށްޓަކައި ހަށިގަނޑުގައި ވަރުޖެއްސުމަށް ކުރާކަމެކެވެ. ﷲ ދެއްވަފައިވާ ސިއްޙަތުގެ ނިޢުމަތައް ޝުކުރުވެރިވެ ފަރުވާތެރިވުމަށްޓަކައި ކުރާ ޢަމަލެކެވެ.

ތިބާގެ ހަޔާތުގައި ކުރާ ކޮންމެ ކަމަކީވެސް ﷲ ތަޢާލާއަށް ޓަކައި ކުރާ ކަމެއްކަމުގައި ހަދާށެވެ! ޘަވާބާއި ދަރުމަ ހޯދުމުގެ ނިޔަތުގައި ކުރާކަމެއް ކަމުގައި ހަދާށެވެ! އޭރުން ތިބާގެ މުޅި ޙަޔާތް ވެގެންދާނީ އަޅުކަމަކަށެވެ.

މާތްﷲ އަޅުގަނޑުމެނަށް ހެޔޮޢަމަލު ކުރުމުގެ ތައުފީޤު ދެއްވާށި!